ለሊኒክስ የPGP አጠቃቀም

እጅግ መልካም የኾነ ብሕትውነት ወይም ፕሪቲ ጉድ ፕራይቬሲ (PGP) የተባለው የኢሜል ግንኙነትዎ ከታቀደለት ተቀባይ ሰው በስተቀር በማንም እንዳይነበብ የሚከላከል ስርዓት ነው። ከኩባንያዎች፣ ከመንግሥት ወይም የኢንተርኔት ግንኙነትዎን ከሚሰልሉ ወንጀለኞች ሊጠብቅዎ ይችላል። በተጨማሪም ምናልባት ኮምፒውተርዎ ቢሰረቅ ወይም ቢሰበር የተጠራቀሙት ኢሜሎችዎ እንዳይነበቡ ይከለክላል።

ከአንድ ግለሰብ የተላከልዎት ኢሜል በትክክል ከተጠቀሰው ግለሰብ የመጣ እንደኾነ እና ከሦስተኛ ወገን የተላከ የሀሰት መልእክት አለመኾኑን ለማረጋገጥ ሊያገለግል ይችላል (ይህ ካልኾነ እውነተኛ የሚመስል ኢሜል በቀላሉ ሊፈጠር ይችላል)። ለስለላ እና የማሳሳት ጥቃት ኢላማ የሚኾኑ ከሆነ እነዚህ ሁለቱም በጣም አስፈላጊ መከላከያ ናቸው።

PGPን ለመጠቀም አሁን ካለዎት የኢሜል ፕሮግራም ጋር አብረው የሚሰሩ ተጨማሪ ሶፍትዌሮችን መጫን ይጠበቅብዎታል። በተጨማሪ በግልዎ የሚይዙት የግል ቁልፍ መፍጠር አለብዎት። ይህ የግል ቁልፍ የተላከልዎትን ምስጢራዊ ኢሜል ለመፍታት እና የሚልኳቸውን ኢሜሎች በእውነት እርሶ እንደላኳቸው ለማሳየት የዲጂታል ፊርማ ለመፈረም የሚጠቀሙበት ነው። በመጨረሻም የአደባባይ ቁልፍዎን እንዴት እንደሚያከፋፍሉ ይማራሉ። የአደባባይ ቁልፍ ሌሎች ሰዎች ለእርስዎ ምስጢራዊ ኢሜል ከመላካቸው በፊት ሊያውቁት የሚገባ እና የሚልኩላቸውን ኢሜል የሚያረጋግጡበት ቅንጣቢ መረጃ ነው።

ይህ መመሪያ በብዙሃን ተቀባይነት ባለው፣ ከክፍያ ነፃ እና ከኢሜል ተጣማጅ በመኾን ዝነኛ በኾነው በሞዚላ ተንደርበርድ PGPን በሊኒክስ ስታይል ስርዓተ ክወና እንዴት እንደሚጠቀሙ ያሳይዎታል።

እንደ ጂሜል፣ ሆትሜል፣ ያሁ! ሜል ወይም አውትሉክ ላይቨ ባሉት የድረ ኢሜል አገልግሎት ላይ PGPን በቀጥታ መጠቀም አይችሉም። ይሁንና የዌብሜል እድራሻዎን በኮምፒውተርዎ ላይ ካለው ከተንደርበርድ ፕሮግራም ጋር በማዋቀር መጠቀም ይችላሉ።

ያስተውሉ ይህ እንዲሠራ በሁለቱም የኢሜል ልውውጥ ዳር ያሉ ሰዎች ከPGP ጋር ተኳኳኝ የኾነ ሶፍትዌር መጠቀም ይኖርባቸዋል።

በመደበኛነት ግለሰቦች ይህን የሚጠቀሙት ከሌሎች ሰዎች ጋር በማይጋሩት የግል መሣሪያዎች ላይ ነው። ደግነቱ PGP ለብዙ ዴስክቶፕ ኮምፒውተሮች እና ተንቀሳቃሽ ስልኮች ይገኛል። የሚያውቋቸው ግለሰቦች የራሳቸውን ስሪት ለማዋቀር ይረዳቸው ዘንድ ይህንን መመሪያ ይጠቁሟቸው።

በኮምፒውተርዎ ላይ ተንደርበርድ፣ GnuPG እና ኤኒግሜልን መጫን

PGP ከአንድ በላይ የኾኑ ሶፍትዌሮች እንዲጠቀሙት ተደርጎ የተፈጠረ ተኳኋኝ ሶፍትዌር ነው። ለPGP የምንጠቀመው ሶፍትዌር GnuPG የሚባለውን ነው። በተጨማሪም ከተንደርበርድ ውስጥ ኾነው GnuPGን መጠቀም የሚያስችለውን ኤኒግሜል የተሰኘውን የተንደርበርድ ተሰኪ እንጨምራለን። የሚከተሉት መመሪያዎችን በተግባር ላይ ለማዋል የተወሰኑ ተጨማሪ መረጃዎች ያስፈልግዎታል።

ልክ እንደ ሬድ ሃት ወይም ፌዶራ ኮር ያሉትን የሬድ ሃት-ቤዝድ ስርጭትን የሚጠቀሙ ከኾነ ተርሚናሉን ይክፈቱና የሚከተለውን ትዕዛዝ ያስኪዱት፦

sudo yum install gnupg thunderbird thunderbird-enigmail

እንደ ኡቡንቱ ወይም ሊኒክስ ሚንት ያሉትን የኡቡንቱ-ቤዝድ ስርጭትን የሚጠቀሙ ከኾነ ትክክለኛውን ሶፍትዌር መጫንዎን ለማረጋገጥ ተርሚናሉን ከፍተው ይህን ትዕዛዝ ይጻፉ፦

sudo apt-get install gnupg thunderbird enigmail

የዴቢያን ስርጭትን የሚጠቀሙ ከኾነ ተንደርበርድን “አይስዶቭ” ተሰኝቶ ያገኙታል። በአጠቃላይ እንደ ዴቢያን ሁሉ ይህ መኾኑ ምክንያታዊ ቢኾንም ምክንያቱ ግን ግልጽ አይደለም። ስሙ የተለየ ቢኾንም አንድ ዓይነት ፕሮግራም ነው። ከዚህ በኋላ በቀሪው የዚህ መመሪያ ክፍል ላይ አይስዶቭን ባንጠቅሰውም “ተንደርበርድን” በአይስዶቭ በመተካት ቢጠቀሙ ሁሉም ነገር ተግባራዊ መኾኑ የሚጠበቅ ነው።

ለመጫን በተርሚናሉ ላይ ይህን ትዕዛዝ ይጠቀሙ፦

sudo apt-get install gnupg icedove enigmail

ተንደርበርድን ማዋቀር

አሁን ተንደርበርድን ጭነዋል። በኮምፒውተርዎ ላይ ሌሎች መተግበሪያዎችን እንደሚከፍቱት (የመተግበሪያዎችን ዝርዝር ከያዘው ምናሌ ውስጥ ሊመርጡት ወይም በመተግበሪያ መፈለጊያ ላይ ስሙን በመጻፍ ሊያግኙት ይችላሉ) ሁሉ አሁን ይክፈቱት። ለመጀመሪያ ጊዜ ሲከፈት የሚመጣውን አዋቂ (ዊዛርድ) ያያሉ።

ጥቅም ላይ የዋለውን የኢሜል አድራሻዎን ለማዋቀር “እስኪፕ ዚስ ኤንድ ዩዝ ማይ ኤግዚስቲንግ ኢሜል” የሚለውን ጠቅ ያድርጉ። በመቀጠልም ስምዎን፣ የኢሜል አድራሻዎን እንዲሁም ማለፊያ ቃል ያስገቡ።

እንደ ጂሜል ብዙ ተቀባይነት ያለው ነፃ የኢሜል አገልግሎት የሚጠቀሙ ከኾነ “ኮንቲኒው” የሚለውን ጠቅ ሲያደርጉ ተንደርበርድ የኢሜሉን ቅንብር በቀጥታ ማግኘት አለበት።

ባለ ጥንድ ቀመር ማመሳከሪያ (ማንጠሪያ) ከጎግል (የስጋት ሞዴሎን መሰረት አድርገው ሊጠቀሙ ይገባል) ጋር የሚጠቀሙ ከኾነ መደበኛ የጂሜል ማለፊያ ቃልዎን ከተንደርበርድ ጋር መጠቀም አይችሉም። ይልቁንም የጂሜል አድራሻዎን በተንደርበርድ ለመጠቀም ለመተግበሪያው የተወሰነ አዲስ የማለፊያ ቃል መፍጠር ያስፈልግዎታል። ይህን ለማድረግ የራሱ የጎግል መመሪያን ይመልከቱ። 

ይህን ማድረግ ካልቻሉ የIMAP እና SMTP ቅንብሩን ራስዎ ተቆጣጥረው ማቀናበር ይኖርብዎታል። ይህን በግልዎ ማድረግ ካልቻሉ የኢሜል አገልግሎት ሰጪዎን ወይም በደንብ እውቀት ያለው ባለሞያ (ይህም ከእርሶ ጋር አንድ ዓይነት የኢንተርኔት አገልግሎት ሰጪን (ISP) የሚጠቀም የመስራቤትዎ የIT ሰራተኛ ወይም ሙያዊ እውቀት ያለው ጓደኛዎ ሊኾን ይችላል) ይጠይቁ። PGPን እንዴት እንደሚጠቀሙ ማወቅ አይጠበቅባቸውም፤ ነገር ግን “የኢሜል አድራሻዬን የIMAP እና SMTP ቅንብሩን ማዋቀር ትችልበታለህን?” ብለው ሊጠይቁ ይችላሉ።

ኤኒግሜልን ማዋቀር

ኤኒግሜል በPGP የተጠቀለሉ ኢሜሎችን የሚያመሰጥር እና የሚፈታ የተንደርበርድ ተሰኪ ሲኾን የአደባባይ እና የግል ቁልፍ አያያዝን በመጠኑ ቀለል ያደርጋል። የጫኑት ኤኒግሜል የመጨረሻው ስሪት ከኾነ የኤኒግሜል ማቀናበሪያ አዋቂ (ዊዛርድ) ይቀርብልዎታል።

ካልቀረበልዎት ግን ይህንን የተንደርበርድ ምናሌ ምርጫን ተጠቅመው እንዲታይ ማድረግ ይችላሉ። በተንደርበርድ መስኮት የቀኝ ክፍል ያለውን ሦስት አግድም መስመር (“ሃምበርገር ሜኑ”) ላይ ጠቅ ያድርጉ።

ኤኒግሜል ኢሜልዎን መቼ ማመስጠር እንደሚፈልጉ ሦስት አማራጮችን ይሰጥዎታል፦

የነባሪ ምርጫዎ ኢሜሉን የሚልኩለትን ሰው “ተጣማሪ ቁልፍ” አውቀው የሚልኳቸውን ኢሜሎች እንዲያመሰጥር ከኾነ፤ ኤኒግሜል የሚልኩትን ኢሜል ያመሰጥራል ነገር ግን የተቀባዩ ተጣማሪ ቁልፍ ከሌለዎት ኢሜሉን ሳያመሰጥር ይተወዋል። በተጨማሪም ለማንኛውም ተቀባይ የሚልኩትን ኢሜል በPGP ቁልፍ ሁሌም ማመስጠር የሚያስችል ምርጫ አለዎት። ይህም ማለት አስቀድሞ የአደባባይ ቁልፋቸው የሌለዎትን የመልዕክት ተቀባዮች ቁልፍ ማግኘት አለብዎት ማለት ነው። ወይም በአጠቃላይ የራስ-ሰር አመስጣሪውን አጥፍተው PGP ሲያስፈልግዎ ብቻ መጠቀም ይችላሉ።

ለእርስዎ ተገቢው ምርጫ ምን እንደኾነ አናውቅም። ነገር ግን “ኮንቪኒያንት አውቶ ኢንክሪፕሽን” የሚለው ምርጫ የተሻለ አማራጭ እንደኾነ እናምናለን። በጥርጣሬ ውስጥ ከኾኑ “ዶንት ኢንክሪፕትማይ ሜሴጅ ባይ ዲፎልት” የሚለውን ይምረጡ። “ኔክስት” የሚለውን አዝራርን ጠቅ ያድርጉ።

አሁን የሚልኳቸው ሁሉም ኢሜልዎች ላይ የዲጂታል ፊርማ ማኖር ይችላሉ። ኢሜልዎን በPGP መፈረም የኢሜሉ ተቀባይ እርሶ መልዕክት እንደላኩለት ማጣራት እና የመልዕክቱ ይዘት በማንም ያልተነካካ መኾኑን ማረጋገጥ ይችላል። ይህንን ገጽታ ለማስጀመር “ሳይን ማይ ሜሴጅስ ባይ ዲፎልት” የሚለውን አዝራር ጠቅ ያድርጉ። ነገር ግን ይህን የማድረግ የጎንዮሽ ጉዳቱ ኢሜል ለሚልኩለት ማንኛውም ሰው PGPን እንደሚጠቀሙ ማሳየቱ ነው። በአንዳንድ የዓለማችን ክፍሎች (ቻይና፣ ኢራን፣ ቤላሩስ፣ እና አንዳንድ የመካከለኛው ምስራቅ መንግስታትን ጨምሮ) ለግል ጥቅም እንኳን ፈቃድ የሌለው ማመስጠሪያን መጠቀም ሕገ ወጥ ነው። ስለዚህ PGPን እንደሚጠቀሙ ለሌሎች ሰዎች ላለማሳወቅ በቂ ምክንያት ይኖርዎታል።

“ኔክስት” የሚለውን አዝራርን ጠቅ ያድርጉ።

አሁን ኤኒግሜል በሞዚላ ተንደርበርድ መዋቅር ላይ አንዳንድ ለውጦችን እንዲያደርግ የሚጠይቅ ምርጫ ያያሉ።

ዲቴልስ የሚለውን አዝራር ጠቅ ካደረጉ እነዚህ ለውጦች ምን እንደኾኑ ማየት ይችላሉ።

በነባሪነት PGP/MIME የሚጠቀሙ ከኾነ (ይህንን በኋላ እናዋቅረዋለን) እንከን አልባ ሽግግር ለማድረግ የሚከተሉትን ምርጫዎች አለመምረጥ (መልሶ ማስቻል) ይገባል፦

  • ዲስኤብል ፍሎውድ ቴክስት
  • ቪው ሜሴጅ ቦዲ አስ ፕሌን ቴክስት
  • ዱ ኖት ኮምፖዝ HTML ሜሴጅስ

የመጨረሻው አማራጭ ኢሜልዎን በሚያመሰጥሩበት እና በሚፈቱበት ወቅት ከሚያጋጥም ያልታሰበ ችግር ይከላከላል። ይጠንቀቁ ይህን ሳጥን ማመልከት የደመቀ፣ የተሰመረበት እና የቀለመ ጽሑፍ የመላክ አቅምዎትን ያሳጣል። ለውጡን ከተመለከቱ በኋላ “ኦኬ” የሚለውን አዝራር ጠቅ ያድርጉ።

አሁን የግል ቁልፍዎን እና የአደባባይ ቁልፍዎን መፍጠር ይጀምራሉ።

የአደባባይ ቁልፍ እና የግል ቁልፍ መፍጠር

የኤኒንሜል ቅጥያን መጫን እና ማዋቀር ተጠናቋል። አሁን የግል እና የአደባባይ ቁልፍ ጥንድዎን የመፍጠር አማራጭ አለዎት። ይህ መመሪያ ከእዚህ በፊት የግል ቁልፍ ፈጥረው እንደማያውቁ በማሰብ የተዘጋጀ ነው።.

“ኔክስት” የሚለውን አዝራር ጠቅ ያድርጉ።

ከአንድ በላይ የኢሜል አድራሻ ካላዋቀሩ በስተቀር ኤኒግሜል ቀድሞ ያዋቀሩትን የኢሜል አድራሻዎን ይመርጣል። በመጀመሪያ ሊያደርጉት የሚገባው ነገር ለግል ቁልፍዎ ጠንካራ የኾነ የማለፊያ ሐረግ ማግኘት ነው።

ኤኒግሜል ስለ የግል ቁልፍዎ እና ስለ ቅንብር አወቃቀሩ አንዳንድ መረጃን ያሳያል። 4096 ቢት ርዝመት ያለው ቁልፍ እንዲፈጥሩ እናሳስባለን። “ኔክስት” የሚለውን አዝራር ጠቅ ያድርጉ።

ከተወሰነ ጊዜ በኋላ የቁልፍዎ የአገልግሎት ዘመን ያበቃል። ይህ በሚኾንበት ጊዜ ሌሎች ሰዎች ለእርስዎ በሚልኳቸው አዳዲስ ኢሜሎች ቁልፉን መጠቀም ያቆማሉ። ይህ ለምን እንደኾነ ማስጠንቀቂያ ወይም ማብራሪያ ላያገኙ ይችላሉ። ስለዚህ በቀን መቁጠሪያዎ ላይ ምልክት ማድረግ እና የቁልፉ አገልግሎት ዘመን ከሚያበቃበት አንድ ወር ወይም ቀደም ብሎ ለጉዳዩ ትኩረት መስጠት ይጠበቅብዎታል።

አሁን ያለውን ቁልፍ አዲስ የወደፊት የአገልግሎት ዘመን ማብቂያ በመስጠት የእድሜ ዘመኑን ማራዘም ወይም ከመጀመሪያው ጀምሮ አዲስ ቁልፍ በመፍጠር መቀየር ይቻላል። በሁለቱም ሂደቶች PGPን ተጠቅመው ኢሜል የሚሰዱልዎትን ሰዎች ማግኘት እና የዘመነውን ቁልፍ ማግኘታቸውን ማረጋገጥ ሊያስፈልግዎ ይችላል። የዘመኑ ሶፍትዌሮች በራስ ሰርነት እምብዛም አይደሉም። ስለዚህ ማስታወሻ ያኑሩ፤ ይህን መተግበር የሚችሉ ካልመሰለዎት ደግሞ የቁልፍዎ የአገልግሎት ዘመን እንዳያበቃ አድርገው ማቀናበርን ከግምት ውስጥ ማስገባት ይችላሉ። ነገር ግን ይህ ሲኾን ለወደፊቱ የግል ቁልፍዎ ከጠፋብዎት ወይም PGPን መጠቀም ካቆሙ ከብዙ ጊዜ በኋላ ሌሎች ሰዎች ከእርስዎ ጋር ለመገናኘት ሊጠቀሙበት ይችላሉ።

ኤኒግሜል ቁልፉን አመንጭቶ ሲጨርስ ትንሽ መስኮት ይከፈትና የመሻሪያ ምስክር ወረቀት እንዲያመነጩ ይጠይቅዎታል። ይህ የመሻሪያ ምስክር ወረቀት የግል ቁልፍዎን እና ተጣማሪ ቁልፍዎን ዋጋ ቢስ ለማድረግ ስለሚያስችልዎ ሊኖርዎት ተገቢ ነው። የግል ቁልፍዎን ብቻ መሰረዝ የአደባባይ ቁልፍዎን ዋጋ ቢስ እንደማያደርገው መገንዘብ አስፈላጊ ነው። ይህም መፍታት የማይችሉትን ሚስጥራዊ ሜልን ሰዎች እንዲልኩልዎ ሊያደርግ ይችላል።

“ጀነሬት ሰርተፍኬት” የሚለውን አዝራር ጠቅ ያድርጉ

የመሻሪያ የምስክር ወረቀትዎን የሚያስቀምጡበት ቦታን የሚያስመርጥዎ መስኮት ይከፈታል። ፋይሉን ኮምፒውተርዎ ላይ ማስቀመጥ ቢችሉም፤ ለሌላ ነገር የማይጠቀሙት እና ደህንነቱ በተጠበቀ ቦታ የሚያኖሩት ፍላሽ ድራይቭ ላይ ፋይሉን እንዲያስቀምጡ እናሳስባለን። በተጨማሪም ያልታሰበ የቁልፍ መሻርን ለመከላከል የመሻሪያ ምስክር ወረቀቱን ከቁልፉ ጋር ከኮምፒውተርዎ ላይ እንዲያጠፉት እናሳስባለን።

ፋይሉን በተለየ ሚስጥራዊ ዲስክ ላይ ማስቀመጥ ደግሞ ከሁሉም የተሻለ ነው። ይህን ፋይል የሚያስቀምጡበትን ሥፍራ ይምረጡ እና “ሴቭ” የሚለውን አዝራር ጠቅ ያድርጉ።

አሁን ኤኒግሜል የመሻሪያ ምስክር ወረቀቱን እንዲያስቀምጡ በድጋሚ ተጨማሪ መረጃን ይሰጥዎታል። “ኦኬ” የሚለውን አዝራር ጠቅ ያድርጉ።

በመጨረሻ የግል ቁልፍ እና ተጣማሪ ቁልፍ ማመንጨትን ጨርሰዋል። “ፊኒሽ” የሚለውን አዝራርን ጠቅ ያድርጉ።

በምርጫ የሚደረግ የመዋቅር ሂደት

ረዥም ኪይ-IDዎችን ማሳየት

የሚከተሉት ደረጃዎች ሙሉ በሙሉ በምርጫ የሚደረጉ ቢኾኑም፤ OpenPGPን እና ኤኒግሜልን ለመጠቀም አስፈላጊ ሊኾኑ ይችላሉ። በአጭሩ ኪይ ID የሚባለው የጣት አሻራው ትንሹ ክፍል ነው። የአንድ ግለሰብን ተጣማሪ ቁልፍ ወደ ማረጋገጡ ሲመጣ የጣት አሻራ የተሻለ መንገድ ነው። የነባሪውን ማሳያ መቀየር የሚያውቁትን የምስክር ወረቀት የጣት አሻራ ለማንበብ ቀላል ያደርገዋል። በመጀመሪያ ኮንፊገሬሽን የሚለውን አዝራር እና ኤኒግሜል ኦፕሽን እንዲሁም መቀጠልም ኪይ ማኔጅመንት የሚለው ላይ ጠቅ ያድርጉ።

ስም እና ኪይ IDን የሚያሳይ ሁለት ረድፍ ያለው መስኮት ይከፈታል።

በቀኝ በኩል ጥግ ላይ ትንሽ አዝራር አለ። ረድፉን ለማዋቀር ይህንን አዝራር ጠቅ ያድርጉት። ኪይ ID ኦፕሽን በሚለው ፈንታ ፊንገርፕሪንት ኦፕሽን የሚለውን ጠቅ ያድርጉ።

አሁን በእያንዳንዱ ረድፍ ራስጌ (ይህም በ“ኪይ ID” ራስጌው በግራ በኩል በቁልፎቹ ዝርዝር በላይ ያለው ነው) መካከል ባሉት መስመሮች መዳፊቱን በመውሰድ እና መስመሩን በመጎተት የፊንገርፕሪንት ረድፉን ወርድ ይቀይሩ። ሁሉንም የኪይ IDዎች ማየት እስኪችሉ ድረስ መስመሩን ወደግራ ይጎትቱት።

አሁን ረድፉ ይህን ይመስላል፦

አሁን መደበኛ እና ምስጢራዊ ኢሜልን ለመላክም ኾነ ለመቀበል የሚያስችል ስርዓትን አዋቅረዋል። ከዚህ ቀጥሎ ምስጢራዊ ኢሜል የሚለዋወጧቸው ሰዎችን እንዴት ማግነኘት እንደሚችሉ በቅደም ተከተል እናያለን።

PGPን መጠቀም የላኪውን እና የተቀባዩን መረጃ ጨምሮ ሙሉ በሙሉ ኢሜልዎን አያመስጥርም። አሁን ባለው የኢሜል ስርዓት የላኪ እና የተቀባይ መረጃን ማመስጠር አይቻልም። ተንደርበርድን ከኤኒግሜል ቅጥያ ጋር መጠቀም የኢሜልዎን ይዘት ማመስጠር እና መፍታት የሚያስችል ቀላል መንገድ ይሰጥዎታል።

PGP እንደሚጠቀሙ ለሌሎች ማሳወቅ

1. በኢሜል PGPን እንደሚጠቀሙ ለሰዎች ያሳውቁ

የአደባባይ ቁልፍዎን ቅጂ በኢሜል አባሪ አድርጎ በመላክ ለሌሎች ሰዎች በቀላሉ ማሳወቅ ይችላሉ።

በሞዚላ ተንደርበርድ ውስጥ “ራይት” የሚለውን አዝራር ጠቅ ያድርጉ።

አድራሻ እና ርዕሰ ጉዳዩን ያስገቡ። ርዕሰ ጉዳዩ “የአደባባይ ቁልፍ” ሊኾን ይችላል። የኤኒግሜል ምናሌውን ጠቅ ያድርጉ እና “አታች ማይ ፐብሊክ ኬይ” የሚለውን ምርጫ ይምረጡ።

አሁን ኢሜሉን መላክ ይችላሉ። ተቀባዩም የላኩለትን የአደባባይ ቁልፍ ማውረድ እና መጠቀም ይችላል።

ይህንን ዘዴ ከተጠቀሙ ምናባልት ኢሜሉ አስቀድሞ የተጠለፈ እና የተነካካ እንዳይኾን ተቀባዩ የአደባባይ ቁልፍ አሻራዎን በሌላ የመገናኛ መንገድ እንዲያረጋግጥልዎ ማድረግ መልካም ሃሳብ ነው።

2. በድረ ገጽዎ PGPን እንደሚጠቀሙ ለሰዎች ማሳወቅ

ኢሜል በመላክ ከማሳወቅ በተጨማሪ የአደባባይ ቁልፍዎን በድረ ገጽዎ ላይ በመለጠፍ ለሰዎች ማሳወቅ ይችላሉ። ቀላሉ መንገድ ፋይሉን ይጫኑት እና አገናኝ ያድርጉለት። ይህ መመሪያ እነኚህን ነገሮች እንዴት እንደሚያደርጉ አያሳይም። ይኹንና ወደፊት ጥቅም ላይ ለማዋል የምስክር ወረቀቱን በፋይል መልክ እንዴት እንደሚልኩ ማወቅ አለብዎት።

ኮንፊገሬሽን የሚለውን አዝራር ከዛም ኤኒግሜል ኦፕሽን በመቀጠልም ኪይ ማኔጅመንት የሚለውን ጠቅ ያድርጉ።

የምስክር ወረቀቱን በደማቁ ከመረጡ በኋላ ምናሌውን ለማምጣት ቀኝ ጠቅ ያድርጉ እና ኤክስፖርት ኪይስ ቱ ፋይል የሚለውን ይምረጡ።

ሦስት አዝራሮች ያሉት ትንሽ መስኮት ብቅ ይላል። “ኤክስፖርት ፐብሊክ ኪይስ ኦንሊ” የሚለውን አዝራር ጠቅ ያድርጉ።

“ኤክስፖርት ሴክሬት ኪይስ” የሚለውን አዝራር ጠቅ አለማድረግዎን ያረጋግጡ ምክኒያቱም የሚስጥር ቁልፍዎን ኤክስፖርት ማድረግ ሌሎች ሰዎች የማለፊያ ቃልዎን መገመት ከቻሉ እርሶን መስለው ሊታዩ ስለሚችሉ ነው።

አሁን ፋይሉን ማስቀመጥ የሚያስችልዎ መስኮት ይከፈታል። ፋይሉን ወደፊት በቀላሉ ፈልገው እንዲያገኙት በዶክመንት ማህደር ውስጥ እንዲያስቀምጡት እናሳስባለን።

አሁን ይህን ፋይል እንደፈለጉ መጠቀም ይችላሉ።

3. የቁልፍ አገልጋይ ላይ መጫን

የቁልፍ አገልጋይ የአደባባይ ቁልፎችን መፈለግ እና ማውረድን ቀላል ያደርገዋል። አብዛኞቹ ዘመናዊ የቁልፍ አገልጋዮች ስምሙ (ተዋዳጅ) ናቸው። ይህም ማለት በአንዱ አገልጋይ ላይ የተቀመጠ ተጣማሪ ቁልፍ በመጨረሻ ለሁሉም አገልጋዮች ይደርሳቸዋል ማለት ነው።

የአደባባይ ቁልፍዎን የቁልፍ አገልጋይ ላይ ማስቀመጥ ተጣማሪ PGP ምስክር ወረቀት እንዳለዎት ለሰዎች ማሳወቂያ አመቺው መንገድ ቢኾንም በቁልፍ አገልጋዮች የአሰራር ተፈጥሮ ምክንያት አንዴ የተሰቀለን የአደባባይ ቁልፍ መሰረዝ የሚያስችል መንገድ እንደሌለ እንዲሁም መሻራቸውን ብቻ ማመልከት እንደሚችሉ ማወቅ አለብዎት።

የቁልፍ አገልጋይ ላይ የአደባባይ ቁልፍዎን ከመጫንዎ በፊት, ተጣማሪ ቁልፍ እንዳለዎት መላው ዓለም እንዲያውቅ እንደሚፈልጉ ወይም እንደማይፈልጉ ጥቂት ጊዜ ወስደው ማሰብ መልካም ነው።

የቁልፍ አገልጋይ ላይ የአደባባይ ቁልፍዎን መጫንን ከመረጡ ወደ ኤኒግሜል ኪይ ማኔጅመንት መስኮት ይመለሱ።

ኪይሰርቨር ምናሌ አይተምስ የሚለውን ጠቅ ያድርጉ እና አፕሎድ ፐብሊክ ኪይ የሚለውን ምርጫ ይምረጡ።

PGPን የሚጠቀሙ ሌሎች ሰዎችን መፈለግ

1. በኢሜል የአደባባይ ቁልፍን ማግኘት

የአደባባይ ቁልፍን በኢሜል አባሪ ተደርጎ ተልኮ ሊያገኙ ይችላሉ።

በመስኮቱ የታችኛው ክፍል ላይ ያለውን አባሪ ያስተውሉ። በአባሪው ላይ ቀኝ ጠቅ ያድርጉ እና “ኢንፖርት OpenPGP ኪይ” የሚለውን ጠቅ ያድርጉ። ትንሽ መስኮት ተከፍቶ የኢንፖርቱን ውጤት ይሰጥዎታል። ኦኬ የሚለውን አዝራር ጠቅ ያድርጉት።

የኤኒግሜል ማኔጅመንት መስኮትን እንደገና ከከፈቱ ውጤቱን ማጣራት ይችላሉ። ሁለቱም የግል እና የአደባባይ ቁልፎች ስላለዎት የእርስዎ የPGP ቁልፍ ደማቅ ነው። አሁን ኢንፖርት ያደረጉት ተጣማሪ ቁልፍ ግን ደማቅ አይደለም ምክንያቱም የግል ቁልፍ ስላልያዘ ነው።

2. ተጣማሪ ቁልፍን በፋይል መልክ ማግኘት

የአደባባይ ቁልፍዎን ከድረ ገጽ በማውረድ ወይም አንድ ሰው በመስመር ላይ ግንኙነት ሶፍትዌር አማካኝነት ልኮልዎት ሊያገኙ ይችላሉ። በዚህ ጊዜ ፋይሉን በማውረጃ ማህደር ውስጥ እንዳወረዱት ያስቡ።

የኤኒግሜል ኪይ ማናጀርን ይክፈቱ እና “ፋይል” የሚለው ምናሌ ላይ ጠቅ ያድርጉ። “ኢንፖርት ኪይስ ፍሮም ፋይል” የሚለውን ይምረጡ።

የአደባባዩ ቁልፉ እንደ .asc፣ .pgp ወይም .gpg ያሉ የተለያየ የፋይል ስም መጨረሻ ሊኖረው ይችላል። ፋይሉን ይምረጡ እና “ኦፕን” የሚለውን አዝራር ጠቅ ያድርጉ። የኢንፖርቱን ውጤት የሚያሳይ ትንሽ መስኮት ይከፈታል። “ኦኬ” የሚለውን አዝራር ጠቅ ያድርጉ።

3. የአደባባይ ቁልፍን ከቁልፍ አገልጋይ ማገኘት

የአደባባይ አገልጋይ ቁልፎችን ለማገኘት በጣም ጠቃሚ መንገድ ነው። የአደባባይ ቁልፍን ለማግኘት ይሞክሩ። የኪይ ማናጀሩን ይክፈቱ ከዛም “ኪይሰርቨር” ምናሌን ጠቅ ያድርጉ እና “ሰርች ፎር ኪይስ” የሚለውን ይምረጡ።

የመፈለጊያ መስክ ያለው ትንሽ መስኮት ብቅ ይላል። በሙሉ የኢሜል አድራሻ፣ በከፊል የኢሜል አድራሻ፣ ወይም በስም መፈለግ ይችላሉ። በዚህ መመሪያ የሚፈልጉት “eff.org” የሚል የያዘ የምስክር ወረቀት ነው።

በርካታ አማራጮች ያሉት ትልቅ መስኮት ብቅ ይላል። ቁልቁል ከሸበለሉት ሰያፍ እና አመድማ የኾኑ ጥቂት የምስክር ወረቀቶችን ይመለከታሉ። አነኚህም የተሻሩ ወይም በራሳቸው ሰዓት የአገልግሎት ጊዜያቸው ያበቃ የምስክር ወረቀቶች ናቸው።

ለምሳሌ የዳንኤልን የአደባባይ ቁልፍ እንውሰድ። እርሱም አንድ የአገልግሎት ጊዜው ያለቀ ወይም የተሻረ የምስክር ወረቀት እና አንድ የሚሰራ የምስክር ወረቀት አለው። በግራ በኩል ያለውን ሳጥን ጠቅ በማድረግ የሚሰራውን የምስክር ወረቀት ይምረጡ ከዛም ኦኬ የሚለውን አዝራር ይጫኑ።

በአንዳንድ አጋጣሚዎች አንድ ሰው ከአንድ በላይ የሚሰሩ የምስክር ወረቀቶች ሊኖሩት ይችላል። ያስተውሉ፦ ማንኛውም ግለሰብ ለሌላ ሰው የአደባባይ ምስክር ወረቀትን መጫን እንደሚችል እና ከሁለቱ ቁልፎች አንዱ የተጓዳኝ የኢሜል አድራሻው ባለቤት ላይኾን እንደሚችል ይወቁ። በዚህ ጊዜ የጣት አሻራን ማረጋገጥ እጅግ በጣም አስፈላጊ ነው።

የተሳካልዎ መኾኑን ለማብሰር ትንሽ የማሳወቂያ መስኮት ብቅ ይላል እናም የኢንግሜል ኪይ ማናጀር የተጨመሩትን የምስክር ወረቀቶች ያሳይዎታል፦

በPGP የተመሰጠረ ኢሜልን መላክ

አሁን ለመጀመሪያ ጊዜ የተመሰጠረ ኢሜል ለተቀባይ ይልካሉ። በሞዚላ ተንደርበርድ ዋናው መስኮት ላይ “ራይት” የሚለውን አዝራር ጠቅ ያድርጉ። አዲስ መስኮት ይከፈታል።

መልዕክትዎን ይጻፉ እና የተቀባዩን አድራሻ ያስገቡ። ለዚህ ሙከራ ቀድመው የሚያውቁት የአደባባይ ቁልፍ ያለው ተቀባይን ይምረጡ። ኤኒግሜል ይህንን ያገኝ እና ኢሜሉን ወዲያውኑ ያመሰጥረዋል (መልዕክቱን እንደሚያመሰጥር በኢሜሉ የታችኛው ክፍል ቀኝ በኩል ባለው ወርቃማ ቁልፍ ያውቃሉ)።

ያስተውሉ ርዕሰ ጉዳዩን አይመሰጥርም ስለዚህ ልክ እንደ “ሄሎ” ያሉ ጉዳት የለሽ መልክቶችን መርጠው ይጠቀሙ።

“ሴንድ” የሚለውን አዝራር ጠቅ ሲያደርጉ የፒጂፒ ቁልፍዎ የማለፊያ ቃልን የሚያስገቡበት መስኮት ይመጣልዎታል። ያስታውሱ ይህ ከኢሜልዎ የማለፊያ ቃል የተለየ ነው!

የማለፊያ ቃልዎን ካስገቡ በኋላ “ኦኬ” የሚለውን አዝራር ጠቅ ያድርጉ። ኢሜሉ ይመሰጠር እና ይላካል።

የኢሜሉ ዋናው መልዕክት ይመሰጠር እና ይቀየራል። ለምሳሌ የላይኛው ጽሑፍ ወደዚህ ይቀየራል፦

በ GP የተመሰጠረ ኢሜል መቀበል

የተመሰጠረ ኢሜልን በሚቀበሉበት ወቅት ምን እንደሚኾን በቅደም ተከተል እንመልከት። በመጀመሪያ በመልዕክቱ ላይ ጠቅ ያድርጉ።

የPGP ቁልፍዎን የማለፊያ ቃል የሚጠይቅ ትንሽ መስኮት ይከፈታል። ያስታውሱ የኢሜልዎን የማለፊያ ቃል እንዳያስገቡ። “ኦኬ” የሚለውን አዝራር ብቻ ጠቅ ያድርጉ።

አሁን መልዕክቱ ተፈትቶ ይታያል።

የPGP ቁልፍን መሻር

የPGP ቁልፍዎን በኤኒግሜል በይነ-ገጽ አማካኝነት መሻር

በኤኒግሜል የመነጨው የPGP ቁልፍ ከአምስት አመት በኋላ የአገልግሎት ዘመኑ ያበቃል። ስለዚህ የቁልፍዎ የአገልግሎት ዘመን ካበቃ እና ፋይልዎ ሙሉ በሙሉ ከጠፋብዎት በኋላ ሰዎች ሌላ ቁልፍ መጠየቅ እንዳለባቸው ማወቃቸውን ተስፋ ያድርጉ።

የPGP ቁልፍን የአገልግሎት ዘመኑ ከማብቃቱ በፊት ለማቦዘን በቂ ምክንያት ሊኖርዎ ይችላል። ምናልባት አዲስ እና ጠንካራ የPGP ቁልፍ ማመንጨት ይፈልጉ ይኾናል። በኤኒግሜል የ PGP ቁልፍዎን ለመሻር ቀላሉ መንገድ የኤኒግሜል ኪይ ማናጀርን መጠቀም ነው። በእርስዎ የPGP ቁልፍ (ደማቅ ነው) ላይ ቀኝ ጠቅ ያድርጉ እና “ሪቮክ ኪይ” የሚለውን ምርጫ ይምረጡ

ምን እንደሚከሰት የሚያሳውቅዎ እና የእርስዎን ማረጋገጫ የሚጠይቅ መስኮት ብቅ ይላል። “ሪቮክ ኪይ” የሚለውን አዝራር ጠቅ ያድርጉ።

የማለፊያ ቃል መስኮት ይከፈታል። የPGP ቁልፍ የማለፊያ ቃልዎን ያስገቡ እና “ኦኬ” የሚለውን አዝራር ጠቅ ያድርጉ።

አሁን እንደተሳካልዎት የሚያሳውቅ አዲስ መስኮት ይከፈታል። “ኦኬ” የሚለውን አዝራር ጠቅ ያድርጉ።

ወደ ኤኒግሜል ኪይ ማናጀር መስኮት ሲሄዱ በPGP ቁልፍዎ ላይ አንዳች ለውጥ ይመለከታሉ። አሁን የPGP ቁልፍዎ ሰያፍ እና አመድማ ይኾናል።

የPGP ቁልፍን በመሻሪያ ምስክር ወረቀት መሻር

ቅድም እንደተገለጸው በኤኒግሜል የመነጨው የPGP ቁልፍ ከአምስት አመት በኋላ ዘመኑ ያበቃል። ስለዚህ የቁልፍዎ የአገልግሎት ዘመን ካበቃ እና ፋይልዎ ሙሉ በሙሉ ከጠፋብዎት በኋላ ሰዎች ሌላ ቁልፍ መጠየቅ እንዳለባቸው እንደሚያውቁ እርግጠኛ ይኹኑ።

ቀደም ሲል እንደገለጽነው የPGP ቁልፉ የአገልግሎት ዘመኑ ከማብቃቱ በፊት ለማቦዘን በቂ ምክንያት ሊኖርዎ ይችላል።

በተመሳሳይ ኹኔታ ሌሎች ሰዎችም በመሥራት ላይ ያለን ቁልፍ ለመሻር በቂ ምክንያት ሊኖራቸው ይችላል።

ቁልፋቸውን መሻር እንደሚፈልጉ የሚያሳውቅ የመሻሪያ ምስክር ወረቀቶች ከጓደኖችዎ ተልኮ ሊያገኙ ይችላሉ።

በቀደመው ክፍል በኤኒግሜል ኪይ ማናጀር አማካኝነት ቁልፍን በሚሽሩበት ወቅት ኤኒግሜል በውስጥ የመሻሪያ ሰርተፍኬት እንደሚያመነጭ እና ኢንፖርት እንደሚያደርግ ተመልክተው ይኾናል። ነገር ግን በእዚኛው የመሻሪያ መንገድ ቀደም ሲል ያመነጩት የመሻሪያ የምስክር ወረቀት በእጅዎ ስላለ ቁልፍዎን ለመሻር እርሱን ይጠቀማሉ።

ከኤኒግሜል ኪይ ማናጀርን ይጀምሩ እና “ፋይል” የሚለውን ምናሌ ጠቅ ያድርጉ ከዛም “ኢንፖርት ኪይስ ፍሮም ፋይል” የሚለውን ይምረጡ።

የመሻሪያ ምስክር ወረቀቱን መምረጥ የሚያስችልዎ መስኮት ይከፈታል። ፋይሉ ላይ ጠቅ ያድርጉ እንዲሁ በተመሳሳይ “ኦፕን” የሚለውን አዝራር ጠቅ ያድርጉ። የምስክር ወረቀቱ በተሳካ ኹኔታ ኢንፖርት እንደተደረገ እና ቁልፉ እንደተሻረ ማረጋገጫ ያገኛሉ። “ኦኬ” የሚለውን አዝራር ጠቅ ያድርጉ።

አንዴ “ኦኬ” የሚለውን አዝራር ጠቅ ካደረጉ በኋላ ወደ ኤኒግሜል ኪይ ማናጀር ይመልስዎት እና የሻሩት የምስክር ወረቀት አመድማ እና ሰያፍ ኾኖ ያዩታል።

የሻሩት ቁልፍ የራስዎ እንዲሁም የአደባባይ ቁልፍዎን ከዚህ በፊት በቁልፍ አገልጋዩ ላይ የጫኑ ከኾነ ሌሎች ሰዎች አይተው ከዚህ በኋላ እምዳይጠቀሙት ለማድረግ አሁን የሻሩትን ቁልፍ በቁልፍ አገልጋዩ ላይ ደግመው መጫን ይጠበቅብዎታል።

አሁን ሁሉም ተገቢ መሣሪያዎች ስላለዎት በPGP የተመሰጠረ ኢሜል ለመላክ ይሞክሩ።

Last updated: 
2014-11-18
JavaScript license information